Geguritan

Geguritan

Geguritan yaiku iketaning basa kang memper syair, mula ana sing ngarani manawa geguritan iku syair Jawa gagrag anyar. Tembung geguritan asale saka tembung gurita, tembung gurita owah-owahan saka tembung gerita. Tembung gerita linggane gita tegese : tembang utawa syair.

Geguritan sakawit tinemu ing lagu-lagu dolanan, saiki mujudake wohing kasustran puisi kang warna-warna wujuding dhapukane. Maca geguritan kuwi beda karo maca waca liyane. Ana cara lan pathokane dhewe. Cara lan pathokan kuwi antarane : kedal, cara pangucape lan gaya basa kang kudu premati. Iku kabeh perlu diwigatekake supaya sing ngrungokake bisa nangkep kaendahan lan surasane geguritan kang kowaca.

Geguritan uga diarani puisi jawa modern. Pangracike mardika, yen puisi lawas tembunge kaiket dening paugeran tartamtu kayat guru lagu, guru wilangan, guru gatra lan sapanuggalane kaya tembang macapat. Puisi Jawa modheren mujudake ekspresi jiwane penyair sajroning nanggapi bab-bab kang dialami, kahanan sakiwa tengene, panguneg-uneg, gegayuhan, wawasan, lan liya-liyane. Geguritan akeh kapacak ing kalawarti basa Jawa, luwih ngrembaka tinimbang crita cekak, uga luwih subur tinimbang tembang macapat.

Para pujanggga kang nganggit geguritan Jawa antarane :

1.    Suhindriyo                        : anggitane Bima Lukar, Wayah Srengenge Mlethek

2.   Krishna Miharja                : anggitane Langit, Pasar, Kori, Nalika Tangi

3.   Turiyo Ragilputra               : anggitane Badhar, Aku Kangen, Tembang Grimis, Donga Bocah Piatu, Tangise Anak-anak Zaman

4.   Yan Tohari                        : anggitane Muksa, Wengi Putih, Dadi Sapu Berang, Tekamu Prasasat Angin

5.   R. Intan                            : anggitane Dayaning Sastra

6.   Subagya Ilham Natadijaya : anggitane Gelenging Tekad

7.   St. Lesmaniasita                : anggitane Kowe Wis Lega

8.   Mulyana Sudarma              : anggitane Guguh Binangun

9.   Rakhmadi                          : anggitane Panyendhu

10. Ani Sumarna                     : anggitane Sukareja

11.  Muhammad Nursaid           : anggitane Geguritan Abang Putih

12. A.S Yasman                       : anggitane Pitutur

13. Eko Raharjo                      : anggitane Mbok Aku Nyuwita

14. A.Y Untung                       : anggitane Angin

15. Eman Suwarto                   : anggitane Gurit Pari

16. Jaimin K                           : anggitane Kaya Ngimpi

Tuladha geguritan.

Tekamu Prasasat Angin

Dening : Yan Tohari

Kalamun kaduga kita mamiling

Tetela pucuk alang-alang iku sing asring sesambat

Ngrerintih, tetangisan, ngaru-aru sauruting rumambate angin

Geneya titimangsa lirwa mring sesanggeman

        Coba delengen mring eseming

        Kembang-kembang mawar

        Ngebaki tamansari pojok kutha, pamer ganda angambar

        Melingake segerombolan kupu-kupu padha andon tresna

        Saiba ngujiwat yen ati katingset ing tali asmara

Banjur nganti kapan sakabehe kudu angrantu

Sapinggiring alun-alun iki, sliramu nate nulis prasetya

Sapinggiring sendang iki, sliramu nate ngengundang

Ewasemana, tekamu nganti saiki prasasat angin

Tanpa gatra, tanpa sabawa...

Kapethik saka Jagad Jawa

Tangise Anak-anak Zaman

Turiya Ragilputra

Pirengna bareng lakune angin, swara gadhuh ngebaki langit

Sawise mataun-taun kali kasatan banyu

Lemah bengkah kasatan embun, lan jingglang purnama

Kelangan gumyak bocah gojegan

O, ing kene wis maabad watu-watu gumlundhung sadawane wengin

Nggawa geni kamurkan kasumat maut : paprangan!

Bumi tinindhih wit-witan ambruk

Bleduge sumawur ngurugi swarga

Suprandene marang sapa kudu tetambuh

Atas kepribaden sing ginadhe tangan mungsuh

Iki zaman tangise anak-anak piatu

Jaman runtuhe eluh kancintakan kum ibu

Kembang luruh luntur lentrih

Penyair bisu. Tangan kelu koncatan tasbih

Musna regane muksa sukmane

Lan guritan kepayahan

Ilang wujud

Absurd!

Bosnia! Bosnia!

Ing endi papan kanggo ndhedhar rasa asih

Muji Allah kanthi ati wening pangucap fasih

Sakliyane paprangan! Pirengna ing kalbumu

Marang sapa bayi-bayi bakal necep banyu susu

Marang sapa bocah-bocah takon kubure ibu

Sadawane dalan, o getih tumetes angganda wangi

Tilase subur kanggo ndhedher tanduran mlathi