Nulis Layang Kitir

Nulis Layang Kitir

Layang kitir yaiku layang kang surasane cekak aos. Mula perangane layang ora ganep. Layang kitir wewujudane kurang luwih kaya telegram nanging panulise tembung ora disingkat kaya panulise sms ing jaman saiki.

Mula saka kuwi perangane layang ora ganep kaya layang lumrahe. Layang kitir kuwi perangane meh saemper karo layang lumrah, nanging tinulis kanthi cekak. Perangan kang tinulis ing layang  kitir bisa katulis mung surasane layang lan peprenahan.

Sadurunge awake dhewe gawe tuladha layang kitir, awake dhewe kudu ngerti ndhisik perangan-perangane layang. Perangan-perangan kuwi antarane :

1.    Titi Mangsa

Yaiku nerangake dina lan wektu nulise layang.

Tuladhane :

·         Demak, 01 Juni 2016

·         Donorejo, Selasa Legi 28 Juni 2014

2.    Satata Basa

Yaiku alamate layang kang dituju. Bisa katulis ing dhuwur dhewe sisih tengen uga ing dhuwur sisih kiwa.

Tuladhane :

·         Kagem Topik, Jl. Bougenvill, No. 16 Ploso Demak.

3.    Adangiyah

Yaiku salam pambukane layang.

Tuladhane :

·         Pamuji Rahayu

·         Salam taklim kula sekaliyan

·         Serat saha pangabekti kula

·         Kairing sagunging pakurmatan

4.   Purwaka Basa

Yaiku perangane layang kang surasane minangka pambuka layang. Umume surasane ngandhakake kahanane kang nulis layang.

Tuladhane :

·         Sesarengan serat kula punika kula ngaturi pirsa bilih kawontenan kula sakaluwarga ing ngriki pinaringan bagas waras lan kawilujengan.

5.    Surasa Basa

Yaiku mratelakake surasa utawa isi lan kekarepane layang.

6.   Wasana Basa

Yaiku perangane layang minangka atur panutuping layang.

Tuladhane :

·         Wasana cekap semanten kabar saking kula, benjang gantos dinten dipun sambung malih.

7.    Salam Panutup

Yaiku salam sabubare nulis layang.

Tuladhane :

·         Nuwun

·         Matur Nuwun

8.   Peprenahan

Yaiku nerangake kang nulis layang.

Tuladhane :

·         Serat saking kula

·         Nuwun ingkang putra

·         Embahmu, iskhaq

9.   Tapak Asma

Yaiku tanda tangan wong sing gawe utawa ngirim layang.

10. Asma Terang

Yaiku jenenge wong kang gawe layang panggonane ana ing ngisore tapak asma.

Ing ngisor iki tuladha layang kitir.

Ø  Bapak, kula benjing sios wangsul, awit badhe preen semester. Nuwun. David.

Ø  Katur mas Bayu ing dalem

Wiyose mas yen ndadekake keparenging penggalih lan ora pinuju kagem piyambak, aku nyuwun ngampil kagunganmu sepedha motor, arep dakenggo tilik sedulur kang lagi lara ing rumah sakit Ngesti Waluyo Parakan.

Dene anggonku mbalekake mengko bengi.

Sunaryo