Gurit Pari

Gurit Pari

Dening : Eman Suwarto

Banjur dak ungak mamburi

Sawise rampung pepaes mratak

Lan katon pasuryanmu kuning pari

Karo nungkulake awak mring pepadha

Pratandha jagad iki wis tuwa

Kagetku banget kepati

Geneya tipet tipet durakaku

Katon cetha wela-wela

Kamangka napas wis ketug mbun-mbunan

Apa bisa dingapura?

Kaya Ngimpi

Dening : Jaimin K

Rasane kaya ngimpi

Crita wingi kang keri

Ngrenggani lembar memori

Ilang sinapu wektu

Pindha kembang megar sakedhepan

Kasapu sampuring saminara

Samrebet ganda wangine

Tanpa tabet

Kabeh bali kudhi

Kaya ngimpi