Mbok Aku Nyuwita

Mbok Aku Nyuwita

Dening : Eko Raharjo

Mbok, aku nyuwita,

Tumuju ing panggonan kang adoh saka padesan,

Murih obahe jangkah,

Sebab urip kudu obah.

Mayuta-yuta pangestumu bakal dak gegem,

Bakal dak ugemi dadi jejimatku,

Nganti tumuju ancas lakuku.

Mbok aku budhal

Tumuju ing panggonan kang ora seneng ngumbar gagasan,

Murih genahe etungan,

Sebab laku kudu kaetung.

Ing kana aku kudu nyuwita, marang wong julig,

Sing kebak kawruhan lan kulina ngecakake laku.

Maewu-ewu pengalaman bakal dak angsu,

Kanggo sangu nggonku ngedu atose balung,

Lungide kadigdayan.

Mbok aku budhal

Ngunggahi palenggahan kang dadi rebutan para dewan,

Murih ngedegne bangsa kang adil,

Adoh pakewuh cedhak karaharjan.

Mbok aku budhal,

Tumuju ing panggonan kang kebak pangarep,

Murih njawab sakabehing misteri.