Pitutur

Pitutur

Dening : A.S. Yasman

Anakku...

Sun kekudang bisoa nggayuh lintang.

Aja tumoleh,

Lamun durung bisa ngranggeh.

Tebahna dhadha, jembarna paseduluran,

Aja keladuk sesongaran,

Mundhak karoban mungsuh!

Eling...mungsuh siji rinasa kakehan,

Sedulur sewu, rinasa isih kurang.

Anakku...

Urip mono kadidene ziarah.

Aja dhemen sesorah,

Lamun isih ngugemi watak srakah.

Elinga!

Sepira dohe urip lan mati kuwi,

Mung sanyari.

Sawise kuwi...kabeh padha kertiwal.

Bandha donya, lunga

Drajad pangkat, minggat

Kadang kinasih, sedulur sinara wedi,

Memule pamrih, ngoncati.

Keri roh...sing arep nyawiji marang Gusti.

Mula piwelingku...

Aja gampang kebidhung ngoyak ibere sulung!

Lamun kebacut mlebu geni,

Mundhak...keduwung.